الله ☢☢الوطـن☢☢ الهلال
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 محمد عبد الماجد .☢☢ .. شكرا..الامانة وصلت

اذهب الى الأسفل 
كاتب الموضوعرسالة
mahmoud moahmed alamin
Admin


المساهمات : 60
تاريخ التسجيل : 30/09/2010
الموقع : عشاق الهلال السوداني

مُساهمةموضوع: محمد عبد الماجد .☢☢ .. شكرا..الامانة وصلت   السبت أكتوبر 02, 2010 1:47 pm




} بعد 19 مباراة في الدوري الممتاز استلم الهلال من المريخ (صدارة) الدوري الممتاز.

} 7 اجانب.

} وواحد مخزن في المغرب.

} وطابق تاني.

} واعلام سالب.

} ومعسكرات.

} وحوافز!!!.

} وحاجات تانية حامياني.

} وفي النهاية ما بتلقوا غير (الوصافة).

} وصافة بي 7 اجانب.

} وحوافز كمان.

} ديل زي الناس البركبوا ليهم في (لوري)..يقنقنوا (العمم) ويتقنقنوا ..ويشحنوا الموبايلات..ويقبلوا ويقولوا نحن ولدنا دا لو ما عقدنا ليه ما بنرجع.

} لا يقعدوا.

} لا يرجعوا.

} يحصل ليهم حادث ...البمرق منهم بقيف ليه في (صينية حركة).

} المهم حاجات المريخ الكتيرة دي كلها ...ما اعفتهم من (الوصافة).

} بالله نحن بي (بياناتنا)..قاعدين في الصدارة.

} هيع.

} فنادق عاوزة مننا قروش.

} سودانير...لاعبو الفريق..والجهاز الفني.

} وبرضو في الصدارة.

} الغريبة ناس الهلال بغلبوا الايامات دي خمسة وستة.

} حالتها دي بدون (حوافز).

} انتوا حوافز جمال الوالي دي وقفت وإلا شنو؟.

} يكون في (اختشاء) شوية الايامات دي.

} الحوافز تكون وقفت.

} عشان كدا ناس الهلال دوروا في هزائمهم القياسية.

} تلاتة فرق من افضل اندية الممتاز ...استقبلت شباك هذه الاندية في ثلاث مباريات 16 هدفا.

} ميشو دا حيرنا فريق الجميعابي في كأس السودان غلبو 17 صفر.

} انا عرفت السبب الخلي ناس المريخ يهددوا بالانسحاب من كأس السودان.

} الجماعة خافوا.

} شافوا الـ (17) ..قالوا ما بنلعب.

} الممتاز استلمنا (صدارته).

} شوفوا ليكم دورة (تنشيطية)..يكون الهلال ما مشارك فيها.

} لو الهلال شارك فيها اقنعوا.

} ناس المريخ ديل يعملوا ليهم شنو؟.

} عملوا ليهم دورة في استادهم ..اسمها (سيكافا)..جابوا ليها حمام من شرق ووسط افريقيا.

} تصوروا ناس المريخ في سيكافا كانوا برضو (وصيف).

} قالوا ليهم خلاص ما تزعلوا.

} نعمل ليكم دورة بعيدة من عيون الهلالاب ديل.

} نعمل ليكم دورة في الامارات مع فرق في مرحلة الاعداد ..وعشان ما تزعلوا هذه الفرق سوف تلعب معكم بالصف الثاني.

} مشوا الامارات.

} طلعوا تاني الطيش.

} انتوا يا المريخاب مالكم ..الحاصل عليكم شنو؟.

} دي زي حكاية واحد ..مشي للدكتور ..قال ليه يا دكتور انا كل ما اكل لي (جبنة) بتعمل لي تسمم.

} الدكتور قال ليه بسيطة ..ما تاكل ليك (جبنة).

} صاحبكم قال للدكتور كلامك دا احسن لي منو (التسمم).

} هسع ناس المريخ ديل اخير ليهم (التسمم).

} نرجع تاني لي موضوع (صدارة) الممتاز.

} طبعا كان هناك تأخر في التسليم والتسلم ...عشان الهلال ما كان فاضي للحاجات دي ...الهلال كان مشغول بمشاركاته الخارجية.

} 19 اسبوع نحن ما شغالين بالممتاز.

} بطولتنا المحببة ..انشغلنا عنها ..عندنا حاجات تانية.

} الممتاز لاحق.

} وقت اتفرغنا ..عملوا لينا برمجة ضاغطة..في اسبوع جبنا لينا 16 قون.

} الظاهر كدا الهلال دا بتنفع معاه البرمجة الضاغطة.

} لعبنا يوم الخميس مع الموردة.

} يوم الاحد سوف نلعب ان شاءالله مع الاتحاد الليبي.

} المريخاب الاتحاد مدني متجرسين من اللعب امامه.

} اتحاد مدني تجرسوا منو ..ونحن اتحاد ليبيا ما شغالين بيه.

} يا جماعة انتوا بتكبروا متين؟.

} متين بتعقلوا.

} اتحاد مدني ما محتاج للجرسة دي كلها.

} نحن ظروفنا صعبة.

} طمبل مصاب.

} ووارغو مشي ليبيا.

} وعبدالرحيم في الامارات.

} ورمزي ذاتو مافي.

} نحن ما بنقدر..نحن ما بنستحمل البرمجة دي.

} نحن تعبانين.

} جمال الوالي دا ليه حق (يتنحي).

} قنع منكم باطن وظاهر.

} الحكاية الما قادر ابلعها.

} قالوا ليك ناس المريخ اجتمعوا مع الاتحاد مدني ..عشان يصلوا لي حل.

} الاتحاد مدني ..قال للمريخ ..انا بوافق علي التأجيل بشرط التنازل من الدخل.

} طيب دا ما (تواطؤ) عديل كدا.

} دا (حافز) لكن بي طريقة مختلفة.

} والله عشان اللف والدوران دا انتوا ما بتمشوا لي قدام.

} هسع نحن الموردة دي ما لعبنا معاه بي ناس النعيم رونالدينو ونادر الطيب وعبداللطيف بويا وبكرى المدينة.

} المشكلة شنو؟.

} انتوا بالعجب ذاتو ما قادرين تصرفو.

} كأس السودان زي السنة الفاتت ..اقنعوا منو برضو.

} تنسحبوا ..ما تنسحبوا بي ناس رمزي صالح الحالف عليه علاءالدين يوسف ما بتعملوا حاجة.

} فييرا استلم ملف رمزي صالح.

} مسك الورق ..وقال خلوا لي الموضوع دا.

} عشان كدا ناس المريخ شالوا هم من هسع من (فييرا).

} قالوا وقفوا لينا.

} عشموا في الايقاف ...طمعوا عشان الاتحاد حقهم..قالوا معتصم جعفر دا ما برفض لينا طلب.

} كأس السودان اقنعوا منو.

} الممتاز خلاص موضوعو خلص.

} يا دوب استلمنا الصدارة ..ونحن وقت نستلم الصدارة ما بنفكها.

} المريخ (الوصيف) كان يتقدم علي الهلال حتي قبيل المباراة الاخيرة في الدورة الاولي للممتاز بـ 6 نقاط.

} ما اشتغلنا بالموضوع.

} عارفين ..نحن وقت الحارة بتجيب ليها (حوافز).

} حوافزكم راحت شمار في مرقة.

} كان يمكن ان يتقدم المريخ علي الهلال بـ 9 نقاط ...لكن اخوان هيثم مصطفي (حفظه الله ورعاه) ..قرروا ان يعلنوا ثورتهم ويصححوا تلك الاوضاع فهزموا وصيفهم عبر مركب ثاني اكسيد (الهوبنة).

} لو بتذكروا وما بتنسوا مهند الطاهر كان جاب ليه قوون وقلب (هوبتو) ..ومدثر كاريكا برضو جاب ليه قوون ..وبرضو قلب (الهوبة).

} الايامات دي (هوبنة) ساكت.

} جنس (هوبة).

} هوباتنا نحن مدورة من زمن احمد النور.

} هسع (الهوبة) عندنا بتبدأ من المعز محجوب.

} ولاد الهلال اخر مرونة...القون معاه (هوبة).

} بكري المدينة ذاتو عندو (هوبة) خاصة به.

} والله جبتوا لي ناس المريخ ديل (نفسيات).

} هوبة مهند الطاهر (مضايقهم) في لقمة عيشهم ...تجي انت يا بكري المدينة تقلب الهوبة ...وتمشي بالمقلوب كمان.

} هو الناس البمشوا عديل كدا..ناس المريخ ما فهموا ليهم حاجة.

} تجي انت يا بكري المدينة ..تمشي بالمقلوب.

} هي الهوبة فهموا ليها شنو؟...عشان تجي وتمشي ليهم بالمقلوب.

} طارق مختار قالوا قعد (يضاير) من هسع.

} طارق مختار ..قال لي (كروجر) انا ممكن امسك (احمد عادل)..لكن زول بمشي لينا بي ايدو ..ما بقدر امسكو.

} ولا بكذب.

} بكري المدينة ذاتو ببالغ.

} يا ريتو لو بقت علي المشي بالايدي...بكري المدينة ..عاوز يجيب ليه قون بي ايدو.

} لو ما الحكم مفتح ...كان مشت عليه.

} ناس المريخ طبعا موضوع (الهوبات) دي عامل ليهم قلق.

} تصوروا الجماعة ديل قالوا لي عبدالحميد السعودي وقت تجيب ليك قون اقلب لينا (الهوبة).

} ناس المريخ بقلدوا في أي حاجة.

} عبدالحميد السعودي قال ليهم انا لو اتقلبت (الهوبة)..ما بقعد ليكم...انا بلعب في الشهر مباراة واحدة ...وبعد دا عامل ليكم فيها انا الكابتن والقائد.

} عامل فيها ولا رنالدو.

} قام ناس المريخ قنعوا من السعودي ...مشوا لي العجب.

} العجب حاول يجازف...الدكتور حزرو ...قال ليه لو عاوز تروح فيها اقلب الهوبة.

} هوبة شنو البقلبها فيصل العجب..انتوا بتلعبوا.

} العجب دا وقت يجيبوا ليه (سيرة) البيان ..بقعد يرجف ..عاوزنوا يقلب ليه (هوبة).

} انتوا كمان اطلبوا ليكم حاجات معقولة شوية.

} اخر حاجة ...الاعلام السالب ..قال احسن يقنع (بلة جابر).

} بلة جابر مسكين ..ممكن بي كل بساطة يقتنع.

} قالوا المغامرة دي ما في زول بقدر عليها غير (بلة جابر).

} احسن حاجة نحن نقعد نقنع بلة جابر.

} مشوا علي (بلة جابر).

} بلة جابر قال ليهم ..انا ما عندي مشكلة ...صحيح الموضوع فيه (تضحيات)..لكن في سبيل المريخ ممكن اعمل أي حاجة.

} الجماعة عاوزين يقوموا كدا.

} بلة جابر قال ليهم : بس في مشكلة صغيرة.

} مشكلة شنو تاني يا بلة؟.

} بلة جابر قال ليهم (الهوبة) دي انا اقلبها ليكم كيف؟...انا ما قاعد اسجل اهداف...اخر مرة سجلت فيها هدف ..كنت بلعب في روابط ديم النور في بورتسودان.

} هسع انتوا بتذكروا كدا..مرة بلة جابر دا جاب ليه قون.

} في التمرين ..ما بنسمع بي بلة جابر جاب ليه قون.

} والله لو منتظرين (بلة جابر) دا يقلب ليكم (هوبة)..واطتكم اصبحت.

} الهوبة خلوها ...شفتوا لاعبي الهلال بحتفلوا كيف بالاهداف.

} حاجة تفرح.

} حاجة تبسط.

} سادومبا كل ما يجيب ليه قون ..يحتفل بالهدف بطريقة جديدة.

} فرح ..وضحك ...والفة.

} تحس بالهدف في الهلال فيه (الفة) العشرة والملاح.

} الاحتفال بالهدف ...احلي من الهدف.

} عاوزين الصور دي تكرر كتير في مباراة الغد مع الاتحاد الليبي.

} ملحوظة: بكرة يوم خاص للهلالاب.

هوامش

} المناضل والفدائي رمزي صالح وقع لمدة 6 شهور في المريخ.

} 3 شهور مع المريخ ..و3 شهور برة.

} مليار جنيه في 3 شهور.

} يا ناس المريخ ابقوا عشرة علي (كلتشي).

} كلتشي الايامات دي بتعرض لي مطاردات كبيرة.

} اغراءات عظيمة.

} امسكوا ولدكم عليكم.

} ناس الامل عطبرة اتصلوا بـ (كلتشي).

} مباراة الغد ..مباراة خاصة للجماهير.

} الجميل ان كيمياء التواصل بين لاعبي الهلال والجماهير عاليا.

} مباراة الغد ..ما فيها خوف علي الهلال.

} هي مباراة اكثر من مضمونة.

} انتصار الهلال غدا ان شاءالله يحسم صدارة الهلال لمجموعته بشكل نهائي.

} لذا تأتي اهمية الانتصار.

} وانتصار الهلال يعني ان الهلال سوف يلعب مباراة الاياب في ملعبه ..في دور الاربعة ..وفي النهائي اذا تأهل ان شاءالله.

} غدا تعالوا كرموا (المقبرة) ليكون نهائي الكونفدرالية في ملعبنا.

} الانتصار في الغد طرف جماهير الهلال.

} لا اخشي علي الهلال في الغد من شيء.

} الاتحاد الليبي ان شاءالله سوف يتجرع هزيمة كبيرة.

} وان غد لناظره قريب.

} بكرة يومنا.

} انتوا خلوكم في الموضوع الميت دا.

} تلعبوا وإلا تنسحبوا.

} تأجيل وإلا مشاركة.

} نحن ما فاضيين للدوشة دي.

} خبر عاجل: بكرة الفرح مجان.
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
محمد عبد الماجد .☢☢ .. شكرا..الامانة وصلت
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
☢☢عـشاق الهلال السـوداني☢☢ :: المندى العام والنقاشات :: منتدى النقاشات-
انتقل الى: