الله ☢☢الوطـن☢☢ الهلال
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 محمد عبد المـاجد . ☢☢ • ناس بتلعب مع (اتحاد) ليبيا..وناس مع (اتحاد) مدنى البرنس والغزال (تضحيات) غير قابلة للتعليق

اذهب الى الأسفل 
كاتب الموضوعرسالة
المارد الازرق



المساهمات : 23
تاريخ التسجيل : 04/10/2010

مُساهمةموضوع: محمد عبد المـاجد . ☢☢ • ناس بتلعب مع (اتحاد) ليبيا..وناس مع (اتحاد) مدنى البرنس والغزال (تضحيات) غير قابلة للتعليق   الثلاثاء أكتوبر 05, 2010 6:41 pm





مسألة


عشرة دخلوا ليهم في (صندوق)..اول زول شال (الصرفة) شال صرفتو وقال ليهم ما عاوز معاكم في الصندوق.


قالوا ليه: ليه؟.


قال ليهم : انا أي صندوق بشيل صرفتو الاولي بطلع منو.


هسع دي مسألة دي.


بتوع التمهيدي


المريخاب خلي (البطولات الحمولة جوا) الوهمية!!..وبقوا ما بتكلموا فيها.


أي مريخابي تلاقي ..يتكلم ليك عن الطابق الثاني واعارة وارغو.


والله الهلالاب ديل مفروض يكرموا جمال الوالي.


او على الاقل يحفزوه.


تنويه


فيصل العجب في 8 سنوات ..رفع كأس الممتاز مرة واحدة...انت يا فيصل العجب لو كنت بتلعب في (جزيرة الفيل) كان حققت انجازات اكتر.


ضيعت موهبتك ساكت مع ناس موسي الزومة ومحمد كمال.


ملحوظة


طمبل مرة يتعالج في القاهرة.


ومرة يتعالج في الامارات.


مفروض يخلوا طمبل ويعالجوا الاعلام السالب في (روسيا).


هسع روسيا ذنبها شنو؟.


تعريجة


واحد اول مرة يشوف ليه (قندران)..وقت شافو اتهجم ..وقال دا شنو؟.


في واحد تاني قال ليه : دا الوصيف؟.


الزول الاول مرة يشوف القندران ..عاين تاني للقندران وقال والله اعلام الهلال ما خاطي عليه.




مدخل اول:


لسه فاضل ناس تعاشر


وناس تضوق طعم الهنا


بكرة اجمل من ظروفنا


ولسه جايات المني


} كلمات اظن كتبها عبدالعزيز العميري...تصلح ان تكون جسرا للتواصل بيننا.


} بكرة اجمل ..واقع الهلال يؤكد ذلك ويثبته ..وموعدنا ان شاءالله (الكأس).


} ميشو ذاتو بقول ان شاء الله...يعني ما في مشكلة.


} في الزمن دا.


} عادي تمشي للدكتور.


} تقول للدكتور ..يا دكتور ..انا ما بنوم.


} الضرس بدون سبب بقوم على.


} والمصران.


} والصداع.


} يا دكتور شوف لي حل ...انا تعبت من المشي للدكاترة ...كملت الدكاترة ...والفقرا ..وبرضو ما في علاج نفعني.


} بقيت زي (المفتاح) الرايح ..يجيب كسافتك بعد داك يتلقي.


} المفتاح الرايح ذنبو شنو هسع.


} الدكتور اول حاجة بقول ليك : انت (مريخابي)...مالك بتشكو من كل هذه الحاجات.


} سبع سنوات (بطولة الممتاز مرة واحدة بواسطة لجنة الحكام وكلتشي المحفز)...الباقي وصافات ساكت.


} 6 وصافات ممتاز ..وصافة كأس السودان ..وصافة سيكافا ..وصافة الكونفدرالية ..وتاني الطيش لدورة الامارات الودية...وطيش المجموعات في بطولة الاندية الافريقية للابطال.


} الدكتور بقول ليك : افتح خشمك.


} انت افتح الخشم.


} الدكتور ..بقول ليك : طلع لسانك وقول سا سا سا سادومبا.


} انت طلع اللسان وقول سا سا سا سادومبا.


} الدكتور بقول ليك : لا ..لا ..انت حالتك خطرة خالص.


} انت مالك كدا البضربو عربيتو من ورا ..ينزل (محرفش) زي كرت الخمسين.


} كدا ابلع ريقك..وقول الايميل اتمسح.


} انت ابلع ريقك وقول الايميل اتمسح.


} أي حاجة يقولها ليك الدكتور اعملها.


} ما تقعد تغالط فيه ساكت.


} الدكتور بقول ليك افتح عينك.


} انت افتح عينك.


} الدكتور بقول ليك ..عندكم زول قبل كدا (اتحوص)...يعني جاتو (حصوة).


} اتحوص دي عند الروس يعني جاتو (حصوة).


} اوعك تدس منو ..قول ليه : عندنا اكرم الهادي قبل كدا جاتو (حصوة).


} احسن الدكتور يكون عارف أي حاجة.


} اوعك تدس منو موضوع (الحصوة) دي.


} الدكتور بقول ليك ...اخذ نفس عميق.


} انت اخذ النفس العميق ...اصلك انت عاوز تأخذو من (سوبر ماركت).


} الدكتور بقول ليك : عندكم زول (اتوقع) قبل كدا.


} اتوقع دي يعني (وقع)...اترتح...اتعتر.


} عند الروس (اتوقع) يعني اترتح.


} انت صارحو في الموضوع دا ..وقول ليه قبل كدا عندنا اخونا طارق مختار (وقع) في النيجر.


} في زول (بترتح) في النيجر يا طارق مختار ...طيب لو مشيت (شمال افريقيا) تعمل شنو؟.


} النيجر دي قالوا لو جدعوا فيها (حجر) ما بقع..انت يا طارق منك وليك كدا بتقع.


} الدكتور ما بفهم أي حاجة.


} بقول ليك اعمل لي (ترسيب) للدم.


} انت طبعا بتخاف ...الموضوع من يدخل (الدم) معناتو خطر.


} الدكاترة ديل الواحد يمشي ليهم بشكو من (ملاريا) عادية ...يقول ليك كدا اعمل صورة للقلب.


} بس جاريين للقلب.


} هسع القلب الدخلو شنو في الموضوع دا.


} انت بتعمل (الترسيب) وتجي صاري (عيونك) في طرفك من الخوف!!.


} الدكتور يعاين للنتيجة كدا.


} بقول ليك ...عندكم زول قبل كدا (اتنوح).


} اتنوح دي اشرحها ليكم ..وإلا عارفينها.


} يمين احلف عليها ..ما في زول عارفها.


} اديكم فرصة تفكروا.


} فكروا ..اطلعوا ..برة ..ارجعوا...ما بتعرفوها.


} اتنوح دي عند الروس يعني (اتنحي).


} بس وصلت تب.


} جيت عديل لي جمال الوالي.


} انت ما تدس عليه ..قول ليه عندنا قبل كدا جمال الوالي (اتنحي).


} لازم الدكتور يكون عارف أي حاجة.


} ما تخجلوا المواضيع دي عادية.


} التنحي دا في برشلونة بحصل.


} الدكتور بقول ليك ..حالتك صعبة شديد ..انت مالك اتأخرت كدا ..خليت الحالة تصل للحتة الصعبة دي.


} كدا عشان اشخصك مية المية ...اعمل (موجات صوتية) للطابق التاني ..انا شاكي يكون في ورم خبيث في (الكشافات).


} انت ما تتضايق ..اعمل ليه الموجات الصوتية.


} اصلو الدكاترة ديل عاوزين صبر.


} الواحد لو مشي يعزي ليه دكتور ..الدكتور بخلي العزاء ..وبقول ليك اعمل لي (موجات صوتية).


} انتوا عاد جاريين للموجات الصوتية.


} الدكتور بعاين لي نتيجة الموجات الصوتية ..وبقول ليك ..حصل قبل كدا (اتحوفزت).


} اتحوفزت دي عند (الروس) يعني حولت (حافز) لفريق أي حي العرب او أي فريق يلعب امام الهلال عشان يغلب الهلال.


} الروس (عيشتهم) تطير.


} انت قول ليه ..حصل قبل كدا حولنا 30 مليون جنيه لفريق حي العرب عشان يغلبو الهلال.


} ما تحاول تنكر.


} الموضوع واضح ما عاوز ليه لف ودوران.


} الـ 30 مليون ظاهرة في دمك.


} الدكتور بعد تعترف ليه بي الحاجات دي بقول ليك : بس خلاص انا عرفت المرض ..ولقيت ليك العلاج.


} خلاص الموضوع انتهي.


} الدكتور يشيل ليه ورقة ويكتب ليك العلاج والدواء..(تمريرة) من هيثم مصطفي (حفظه الله ورعاه).


} انت طبعا ح تقول ليه : لكن يا دكتور (الروشتة) دي اصرفها من وين؟.


} الدكتور بقول ليك من استاد الهلال.


} يعني ح تصرفها من (مجلس الامن).


} مجلس الامن هسع ذنبو شنو؟.


} انتوا عارفين (تمريرة) هيثم دي (مريحة) للاعصاب ..هادية ...(ومكيفة) كمان.


} تمريرة تخلي (المهاجم) يضحك من الاضان للاضان.


} ينبسط جنس انبساطة ...تقول طالع من الصراف.


} قلت ليكم (تمريرة) مريحة ومكيفة كمان ..قعدتوا تغالطوا.


} مرة سألت ..هيثم مصطفي عن سر (تمريرته) فقال لي ...اذا اردت ان تسجل هدفا لا بد تكون هناك (معادلة) صحيحة للوصول الي (الهدف).


} قلت لي هيثم كيف يعني؟.


} قال لي في (معادلة) اذا وصلت اليها ..سوف تصل الي الهدف ..هذه المعادلة هي حسبة (المسافة والزمن)..بمعني انك يجب ان تحسب (المسافة) جيدا قبل التمرير ..اين يقف المهاجم ...واين ستكون نقطة الالتقاء بين الكورة والمهاجم ..واين يقف المدافع ..واين يقف حارس المرمي ...اذا نجحت في الوصول الي (المسافة) من هذه المساحات ..يجب ان تحسب (الزمن) وحسبة الزمن تكون في سرعة المهاجم وقراءته للكرة وسرعة الكورة نفسها وتفاعلها مع سرعة المهاجم. ..وعدم وقوعه في حالة تسلل.


} هكذا يحسب هيثم مصطفي لتمريرته.


} انت قايلنها (هبتلي) ساكت.


} الزول دا بقعد ليها ..وبقعد يحسب فيها.


} تمريرة البرنس ...فيها (فكر وفلسفة ورياضات).


} والله يا (هنو) لو كنت بتلعب في الهلال كنت فترت من الطلوع في (التربيزات).


} تمريرة هيثم مصطفي باختصار شديد جدا زي متجر (هارودز) في حي (نايتسبردج) في لندن.


} الله.


} دخلنا المنطقة الصعبة.


} جابت ليها (هارودز) كمان.


} هذا المتجر ..تخيلوا ماذا قال عنه الطيب صالح.


} الطيب صالح قال عن هذا المتجر ..(لم اشتر منه شيئا أبدا ، فذلك فوق طاقتي ، ولكنني ازوره أحيانا للفرجة..كما أزور المتحف البريطاني ، ومتحف الـ (تيت قلري) ....).


} يعني (تمريرة) هيثم زي (المتحف).


} ناس موسي الزومة (الموقوف من الاتحاد الافريقي) بتفرجوا فيها.


} انتوا حراس المريخ ديل الحاصل عليهم شنو؟.


} واحد ...شطبتو (حصوة).


} وواحد موقوف من الاتحاد الافريقي.


} والتحت السن برضو موقوف.


} المناضل والفدائي رمزي صالح ...(حالف عليه علاءالدين يوسف)..قال ليه ما اشوفك بين الخشبات.


} يا رمزي صدقني ح تتعب مع فييرا.


} خلاص فييرا ختاك في رأسو ..وشال ملفك من (جامعة الدول العربية).


} .............


مدخل ثاني


} ((في 4 اكتوبر سنة 1957 اطلقت روسيا أول قمر صناعي (سبوتنك) الاول فاخترق طبقات الجو المحيطة بالكرة الارضية متحررا من جاذبية الارض التي سجنت كل ما كان عليها ألوف الملايين من السنين ..اهتز أولو الالباب في انحاء العالم لعظم الوثبة التي استطاع الانسان ان يثبها في عالم الطبيعة ، وادراكه من نواميسها واستغلال هذه النواميس لتحقيق أغراضه).


} هذا ما وثقه التاريخ وقدمه لنا عن انطلاق اول قمر صناعي.


} اتفقنا علي النقطة دي.


} عشان ندخل على النقطة الثانية.


} نحن أي حاجة عندنا بي نظام.


} محمد احمد بشة ..لم يخيب ظننا ...فقد جاء اول من امس ليثبت فعلا انه رائد ثقافة (رصاصة الرحمة).


} رصاصة الرحمة عيشتها تطير ..الماسكها لينا دي.


} كل هدف يسجله بشة يكون بمثابة (رصاصة الرحمة) التي تطلق علي الضحية.


} في مباراة الهلال الاخيرة امام الاتحاد الليبي ..جاء الفريق الليبي في الشوط الثاني من اجل ادراك التعادل..وقد اوشك ان ينجح في ذلك ربع الساعة الاولي من عمر الشوط الثاني.


} وكان الخوف قد بدأ على عشاق الهلال وهم يشاهدون تحركات الفريق الليبي وفك الحصار الذي كان الهلال يفرضه علي (الضحية).


} عندما بدأت تضيق حلقاتها على الهلال ..كان محمد احمد بشة رائد ثقافة اطلاق رصاصة الرحمة يسخن علي الخط للدخول.


} انه (نيكولاس) الذي حدثتكم عنه قبل ذلك.


} جاء محمد احمد بشة (نيكولاس) ليطلق على الضحية الليبية (رصاصة الرحمة) حيث الهدف الثاني للهلال.


} هدف فيه كل الروعة.


} فيه كل الخلاص.


} هدف كان بمثابة (رصاصة الرحمة) حقا.


} به قضي امل الفريق الليبي ...والوصيف ايضا فقد كانوا يترقبون (خلسة) ان يسجل الاتحاد الليبي في الهلال.


} لكن (بشة) عن طريق تمريرة سادومبا (البرنسية) سجل الهدف الثاني.


} انتهت.


} مثلما قالها قبل ذلك ايفوسا الذي سجل هدف الهلال الثالث في المريخ.


} ومثلما فعلها قودوين وهو يسجل الهدف الثالث في الاهلي المصري ويعلن عن نهاية المباراة.


} بشة رائد ثقافة اطلاق (رصاصة الرحمة)..فعلها واعلن عن نهاية المباراة ..ليتراجع الفريق الليبي ..وينصرف لاعبو الهلال الي التطريب والاداء الممتع.


} خاصية اخري يتميز بها (بشة) الذي تذكرني اهدافه بالاقمار الصناعية ...اهدافه كلها (صاروخية)...سواء كانت بالرأس او في خط ستة او خارج الخط ...كلها ..كلها (صاروخية).


} اهداف تشبه (الاقمار الصناعية).


} ولذلك ذكرت لكم قصة اول قمر صناعي تطلقه روسيا.


} اذن هدف بشة في الاتحاد الليبي مثل (سبوتنك) ..وهو اول قمر صناعي يطلق في الفضاء.


} علما ان الاشهر في عالم الفضاء هو (يوري جاجارين) الذي دار في الفضاء داخل احد الاقمار في 12 ابريل 1961.


} وقاقارين هو نائب رئيس نادي الهلال الحالي.


} يعني (اقمارنا) في المجلس وبين اللاعبين.


} يا بشة ..الله يحفظك ..ويديك العافية ..فقد اصبحت (اهدافك) وحدها التي تفرح.


} وحدها التي تبسط هذا الشعب.


} السكر يزيد.


} الخبز يرتفع سعره.


} مواصلات مافي.


} كل هذه الاشياء يغطي عنها (هدفك) عندما يسجل.


} هذا يجعلني اسألك...(جيتنا من وين يا هنا).


} اسألك بنص اغنية الامين عبدالغفار...فانت قد دخلت لكشوفات الهلال في تمهل.


} لم تسبقك ضجة ..ولم يتحدث عنك احد غير الديبة.


} بل كان بعضهم يرفض تسجيلك.


} أتيتنا في (غفلة) لتمنحنا كل هذا الفرح.


} انت يا بشة ...(جيتنا من وين يا هنا).


} هكذا في (تمهل) دخلت لكشوفات الهلال.


} ودخلت في (تمهل) ايضا الي قلوب جماهير الهلال.


} واصبحت كلما قمت من (كنبتك) ودخلت الملعب تسجل (هدفا).


} وهدفك دائما بمثابة (رصاصة الرحمة).


} نعم انه (نيكولاس).


} او رائد ثقافة اطلاق (رصاصة الرحمة).


} .............


مدخل ثالث


} سباق (الماراثون) هو سباقات الجري للمسافات الكبيرة...ويبلغ طول مسافة سباق (الماراثون) 26 ميلا او 40 كيلومترا.


} في اولمبياد روما عام 1960م...اجتمع أبطال العالم في الالعاب الاولمبية في سباق الماراثون.


} كان التنافس على اشده بين ابطال العالم...وكان يشارك في السباق من سبق له الفوز بمثل هذه المسابقات.


} لكن الذى كان قد فاز بالبطولة في هذا السباق كان جندي صغير جاء من الحبشة.


} هذا الجندي كما قيل كان يجري وسط الناس بسخرية ..وكانوا يضحكون من مشاركته في هذا السباق العالمي.


} المضحك ان هذا الحبشي كان يجري (حافي القدمين)..ولم يسبق له المشاركة من قبل في سباق مدرسي حتي.


} مع هذا فقد كان هذا الجندي هو الفائز بالسباق رغم انه يشارك وينافس عمالقة.


} سادومبا قصة لاعب اخر..لاعب مثل (البرق).


} البرق بجيب (حصوة).


} سادومبا هولب لب.


} شي تشوف ..وشي ما تشوف.


} كربع ..كربع ..كربع...


} كربع دي بالروسي يعني (شي تشوف وشي ما تشوف).


} تكمع ..تكمع.


} تكمع دي بالبرتغالي يعني (شي تشوف وشي ما تشوف).


} قالوا ليك (ادروب) اول مرة يدخل استاد الهلال قال ليك الهلال دا عندو لاعب يتشاف رهاب ..رهاب.


} سفاري ..مرة سألوه ..قالوا ليه انت سادومبا دا ما بتقدر تمسكو مالك.


} سفاري قال : سادومبا دا منو؟...انا بس بشوف (نمرة الفانيلة) تجي مارة فينا وتفوت.


} بشوف (11) شووووووووووو تفوت.


} شووو...تجي راجعة فينا.


} في واحد قال ليه انت وقت بتشوف (النمر) ما تبلغ ناس المرور.


} ناس المرور ذنبهم شنو؟.


} يخلوا شغلهم ويقعدوا يلاحقوا في (سادومبا).


} بعدين سادومبا ذاتو ما بتلحق.


} شي تشوف ..وشي ما تشوف.


} غايتو نحن ارتحنا من كلتشي جنس راحة.


} لاعب تقول (تاكسي تعاوني).


} ميت جنس موت.


} مهاجم يطمع المدافعين في الهجوم علينا.


} والله مفروض جمال الوالي دا (يحفزوه) على انو ريحنا من (كلتشي).


} انتوا بالمناسبة دي..ناس (الوصيف) لقوا الزول المسح الايميل.


} قالوا ليك (مريخاب) ساكنين ليهم في بيت ناصية.


} بيت فاضي ..ما فيه أي حاجة ..ما عندهم الحبة.


} مريخاب زهجانين وقافلة معاهم.


} المريخاب ديل برجعوا اخر اليوم تعبانين ..وما عندهم نفس ..يفتحوا سيرة المريخ ..العشا يطلع من نفسهم ينوموا القوا.


} ما في أي حاجة عاجباهم في المريخ.


} قافلة معاهم قفلة شديدة.


} في اثناء القفلة دي ..مرة جاهم حرامي.


} الحرامي شقي الحال ما لقي أي حاجة يشيلها ..عاوز يطلع المريخاب صحوا بيهو.


} قالوا ليه : تعال هنا ..الجابك شنو؟.


} الحرامي قدر ما حاول يعتذر ما قدر يتخارج.


} في واحد من المريخاب قرفان شديد ..شال ليه عكاز وقبل على (الحرامي)...وقال ليه : انت صحيح ما شلت حاجة ..لكن بي عويناتك دي تكون انت الزول المسح الايميل.


} بقية المريخاب من سمعوا سيرة الايميل وقعوا ليك في (الحرامي) خبت.


} الحرامي وقت الضرب كتر عليه.


} قال ليهم : يا جماعة انا ما مسحت (الايميل)..لكن انا الزول الشلت (الحافز).


} حافز في عينك.


} تحفزوا في الفرق.


} وخميس مارتن ما عاوزين تدوه قروشو.


} هسع خميس مارتن ذنبو شنو؟.


} ..........


مدخل رابع


} في احدي قصص الاديب الراحل الطيب صالح هذا المقطع الذي يتوافق تماما مع فرح الناس عندما ينتصر الهلال.


} يقول الاديب الطيب صالح : (استيقظت في فراشي ، وأرخيت أذني للريح. ذاك لعمري صوت اعرفه. سمعت هديل القمري ، ونظرت إلي النخلة القائمة في فناء دارنا ، فعلمت أن الحياة ما زالت بخير.انظر الى جذعها القوي المعتدل ، وإلى عروقها الضاربة في الأرض ، وإلى الجريد الاخضر المنهدل فوق هامتها فأحس بالطمأنينة . أحس بأنني لست ريشة في مهب الريح، ولكني مثل تلك النخلة مخلوق له أصل وله جذور ، وله هدف).


} ونحن اول امس كان لنا اكثر من هدف.


} وكان هديل القمري.


} هدفان ...سادومبا وبشة ..دا زي الزول البتمشي ليه ويقول ليك : ساخن وإلا بارد؟.


} انت تقول ليه : ساخن وبارد...جيبوا لي عصير ..وبعدو جيبوا الشاي ..ما في مشكلة.


} سادومبا هدفه بمثابة (العصير).


} بشة هدفه (الشاي).


} او زي الزول في رمضان يكون معزوم افطار..يقولوا ليه : شاي وإلا قهوة.


} يقول جيبوا لي الشاي والقهوة الاتنين بشربهم.


} سادومبا (القهوة).


} وبشة (الشاي).


} نحن أي حاجة عندنا بي نظام.


} يا ود الناس نحن فترنا من نظامك دا.


} الهلال امس وزع الفرح على كل الطرقات..والشوارع.


} على كل البيوت ...ما خلينا لينا (طابونة) ما وزعنا ليها (فرح).


} غشينا الصيدليات ..صيدلية ..صيدلية ..اي صيدلية ختينا فيها (تمريرة)..من تمريرات البرنس.


} وكتبنا في الروشتة.


} تمريرة مساء..وتمريرة صباح.


} الله يديكم العافية انتوا ..مليتوا البلد فرح.


} وزعتوا للناس (الضحك)...رجعتونا تاني للصفوف الكورة ...وبكري المدينة.


} الشي شنو؟.


} روعة ..متعة ..تقول تشكيلتكم دي فيها (محمد وردي).


} تقول بشة شايل ليه (عود وكمان).


} يا ناس ..يا عالم.


} المدارس ..رجعت تاني تضع (الحصة الاولي) في الجدول ..(تمريرة) هيثم.


} قوم اشرح لينا.


} اشرح ليكم ..ما في مشكلة.


} انا عارف (تمريرة) سيدا ..عاوز ليها شرح.


} نمسك ليكم (العين).


} طيب العين دخلها شنو بالتمريرة.


} كيف ما عندها دخل...(الرؤية) دي انتوا فاكرينها طالعة من فراغ.


} (ينتشر على شبكية العين 137 مليون عنصر مستقل تعمل كلها لتجعل عملية الابصار ممكنة، وتظل هذه العناصر والاعصاب التي تنقل المؤثرات المختلفة الى المخ تتركز وتتركز حتى يصبح عددها لا يتجاوز المليون إلا بقليل).


} يعني في 137 مليون عنصر تعمل في الشبكية عشان يحصل الشوف.


} هيثم مصطفي (حفظه الله ورعاه) بشغل الـ 137 مليون عنصر في (التمريرة).


} عشان كدا التمريرة بتكون قون.


} يا جماعة الكلام دا كلام علمي ..درسوه في المدارس.


} درسوه في (الحصة الصباحية).


} نحن أي حاجة عندنا بي نظام.


} واحد قال لي هيثم مصطفي (قولوا ما شاءالله) عندو 17 عين.


} اربعة عيون ..بتعاين للمهاجم قبل التمرير...وعين مع حكم الرأية..وعين مع حكم النص..وعين مع الحكم الرابع و5 عيون بتابع تحركات المدافعين ..و3 عيون مع الزملاء وباقي العيون بنشرها هيثم مصطفي في المكان للتمويه.


} شفتوا كيف؟.


} تقولوا لي العجب.


} العجب قبل 15 سنة ما بقدر يقلب الكورة الاخذها هيثم مصطقي (دبل كيك).


} قولوا ما شاءالله.


} حالتو لاعب وعندو تمزق في اربطة الكتف.


} هسع العجب بكرة يشكو من (كتفو).


} طبعا ما قدر يقلدو في (البيان)...عشان كدا بحاول يقلدوا في (الكتف).


} نرجع للمباراة.


} الهلال امس بحجر واحد اصاب ليه الف عصفور.


} اول حاجة تأهلنا.


} تاني حاجة حسمنا موضوع الصدارة.


} ثالث حاجة حددناها مع الاشقاء في مصر.


} ناس مصر ديل مرة جونا بالاهلي المصري ضربناهم.


} مرة بالزمالك ...ما خليناهم.


} المرة دي جونا بي حكم مصري ومدرب مصري ..لزوم يعمل تغيير شوية.


} برضو حسمنا الموضوع.


} نحن أي حاجة عندنا بي نظام.


} الف مرة اقول ليكم كدا.


} تقعدوا تغالطوا.


} اقول ليكم حاجة ما تطلع من العمود دا.


} الاهلي الليبي يفكر في اعارة وارغو الى (الصومال).


} اضبط ...زولكم يمكن يلعب في (وقد) الصومالي.


} يا وارغو ..(ما تهتم للايام ظروف بتعدي).


} نحن عارفين الزول البقبل عليه الهلال بيلعب في (ليبيا).


} .........


المدخل الخامس


} (في احد الميادين ببلدة في ولاية كانساس وضعت لافتة كتب عليها:


} ممنوع لعب الكرة ..ممنوع ركوب الدراجات..ممنوع اصطحاب الحيوانات الاليفة...لا تنسوا ان هذه حديقتكم).


} اتحاد كرة القدم السوداني هنا ..منع على الهلالاب كل شيء...مع ذلك في كل لحظة ينبهنا ان هذا الاتحاد العام ...هو اتحادنا.


} في ظرف اسبوع لعب الهلال ثلاث مباريات في الدوري الممتاز ..خرجنا منها بـ 9 نقاط و16 هدفا.


} ولعب الهلال في البطولة الكونفدرالية امام الاتحاد الليبي بعد 72 ساعة فقط من مباراة الهلال امام الموردة.


} انتصر الهلال علي الاتحاد الليبي وانتزع صدارة مجموعته.


} غير انه من مفارقات كرة القدم ..اننا عندما كان يلعب المريخ مع (الاتحاد) مدني عصرا ..كان الهلال سوف يلعب مساء امام الاتحاد الليبي.


} المريخ واجه الاتحاد في (كأس السودان).


} ونحن واجهنا الاتحاد في (الكونفدرالية).


} وكل فريق يلعب مع (الاتحاد القدرو).


} العب يا ولد مع القدرك.


} انتوا فاكرنها (صدفة).


} نحن أي حاجة عندنا بي نظام.


} المضحك ان بعض المريخاب استنكروا في ان يفرح الهلالاب بانتصارهم على الاتحاد الليبي...وفي نفس الوقت كان فرح المريخاب مبالغا فيه لانهم انتصروا علي الاتحاد مدني.


} شن جاب لي جاب.


} يعني ما نفرح.


} خلاص يا هلالاب ازعلوا.


} طرشقوا.


} تاني ما اشوف لي هلالابي بضحك.


} ولا حتي ببتسم.


} ما عاوزين ولا (ابتسامة).


} الفرح ممنوع.


} افرحوا انتوا 6 سنوات وصافة.


} افرحوا انتوا والفريق الذي اخرجكم من بطولة الكونفدرالية فرقو من الهلال الان في المجموعة 11 نقطة.


} طيش المجموعة بي نقطة واحدة.


} انا ما عارف (الجيش) دا جيش في شنو؟.


} وما عارف الفريق دا بي فصاحتكم دي ..غلبكم كيف؟.


} تتفاصحوا ساكت ..وتغالطوا.


} الغلاط في شنو؟.


} خلاص ..فييرا (بصم).


} والحافز ..ما فيه أي حاجة ..ما فيه أي مشكلة.


} والايميل اتمسح.


} وطارق مختار ذاتو ما وقع.


} اها قصرنا معاكم.


} وحصوة اكرم سادومبا ما سببها.


} وجمال الوالي ما (اتنحي).


} تاني في حاجة.


} الطريف في الامر ان المريخاب يوم ان رحل منهم علاءالدين يوسف وشال شنطتو وقال انا ما بصمت ..ما قالوا أي حاجة.


} ويوم رفض فييرا مليارات الوالي ...ما قالوا أي حاجة.


} ويوم اصبح فييرا من افضل لاعبي خط الوسط في السودان ..برضو ما قالوا حاجة.


} اها قالوا حاجة متين؟.


} قالوا حاجة وقت فييرا اطرد في مباراة الهلال والخرطوم.


} اتاري الجماعة ديل لابدين بي (مغصتهم).


} كلهم قعدوا يتحدثوا عن (الطرد).


} انتوا في البصمة ما قدرتو تقولوا حاجة ..عاوزين تقولوا حاجة هسع.


} بركة الاتنفستوا.


} دا زي الزول الضربوه (كف).


} زولكم اكل الكف وقال لي الزول الضربو (كف) انا تضربني (كف) ما مشكلة عندي ..لكن يومك (التمسكل) لي بخسرك.


} فييرا دا لاعبنا وإلا لاعبكم.


} نحن عاوزنو يطرد.


} مالكم انتوا.


} تخلوا حال فريقكم المايل وتتكلموا عن طرد فييرا.


} ناس الاتحاد الافريقي اوقف منهم 4 لاعبين ومدرب برازيلي ومدير كورة وبتكلموا عن (طرد) فييرا.


} دي زي حكاية الزول العندهم عرس ..وبمشي يفطر في (سماية) زميلو الشغال معاهم في المكتب.


} هسع (السماية) ذنبها شنو؟.


} بتقول ليك كلام غريب.


} ملحوظة: غايتو انا لو كنت مريخابي كان عمودي دا بحتجب عشر سنوات احتراما للقراء.


هوامش


} انور سلامة دا لو لاقنا مع (برشلونة) بنضربوا ليكم.


} في الكورة دي نحن ما بنعرف (نرحم).


} الهلال هو الفريق الوحيد البتظلم من الحكم وهو لاعب في ارضه ووسط جمهوره.


} المريخاب كلو ما يشوفوا (بشة)..يقولوا احسن حاجة عملها جمال الوالي هو انه (اتنحي).


} دا زول بفكوا من (غرفة التسجيلات).


} الباشا في ليبيا قالوا شاهد مباراة الهلال والاتحاد قطع ليه (جردل) موية.


} يا زول انت لي هسع (عطشان).


} سادومبا دا واحد خلي يمشي مصر للعلاج (اكرم)..وواحد خلي يلعب في (ليبيا) ..(الباشا).


} انت يا سادومبا البلد دي حقتك.


} شنو بتغرب في اولاد الناس.


} هسع الباشا دا ذنبو شنو عشان يلعب في (ليبيا).


} ليبيا دي نحن بنغلبها برة وجوة.


} لكن اقول ليكم حاجة.


} وارغو بتأقلم في (ليبيا).


} بتأقلم سريع ..عشان ليبيا ما فيها (سامي عبدالله).


} وارغو كان برجف من سامي عبدالله في تمرين المريخ.


} اللاعب مسكين (الخوفة) الدخلت فيه ..في ليبيا ما طلعت.


} دفاع الاتحاد الليبي ..قالوا رجع ليبيا وهو وبشكي من حالة (عطش).


} سادومبا ذاتو ما براه ..بكري المدينة (الباك) يقدمو ويفوتو.


} وكاريكا شغال فني تخدير عديل كدا.


} سرعة غريبة.


} نحن برة فترنا.


} قولوا ما شاءالله.


} غايتو المناضل والفدائي رمزي صالح لو شاف مباريات الهلال الاخيرة ..ما بقعد ليكم.


} بقول اخير اناضل في (فلسطين).


} هسع (فلسطين) ذنبها شنو؟.


} بس ان شاءالله (الجامعة العربية) ما تدخل لينا في الموضوع دا.


} انا خايف جامعة الدول العربية ..تدخل وتوقف (تصويبات) مهند الطاهر.


} مهند براه.


} بويا ذاتو عندو كلام.


} الذي يجب ان يقال هو ان اداء الهلال تميز بالسرعة والضغط.


} فريق الاتحاد الليبي كان طوال الـ 90 دقيقة بيلعب في منطقته.


} محبوس عديل.


} انور سلامة ...ما قدر يقوم من الكنبة.


} يقوم يعمل شنو؟.


} قالوا ليك (باكات) الاتحاد الـ 14 بشكوا من (الحصوة).


} مستشار رئيس الجمهورية في جزر القمر عبدالمنعم جاء من جزر القمر ليلحق بمباراة الهلال والاتحاد.


} زول جاكم من القمر عديل يا ناس الهلال عشان يتفرج عليكم.


} عبدالمنعم في تنظيم الهلال وكفي يرتبوا لتكريم كاريكا وسادومبا في الايام القادمة.


} ليس هناك اروع من الهلالاب.


} في موقع (الفيس بوك) احد الاشخاص دخل في هذا الموقع باسمي وصورتي ويضع شعار الهلال كتعريف به ..لا علاقة لي بهذا الشخص ..انوه الاخوة المنضمين كمعارف لهذا واصدقاء ..اني لا اعرف هذا الشخص واني ليس مشتركا في هذا الموقع.


} واعتذر لكل الذين تواصلوا معي عبر هذا الشخص.


} ولهم العتبي.


} اعتذر لكل من وجد تجاهلا ..او ردا اغضبه.


} بعض الاخوة الزملاء صححوا عبر الموقع هذا الامر.


} كاريكا في مباراة الاتحاد كان شعلة من النشاط ..قدم مباراة كبيرة وكان من نجوم المباراة.


} كذلك لعب مهند الطاهر الشوط الاول بتألق لافت رغم انه سمع برحيل جدته قبل ساعة من المباراة.


} بكري المدينة في دقائق فعل ما يفعله الاخرون في مباراة كاملة.


} بكري المدينة ماشي صاح.


} يوسف محمد ..رجع الي يوسف محمد المونديالي.


} خليفة دافع وهاجم ...وكان في الدفاع وفي الهجوم جيد.


} ميشو درس الاتحاد جيد وعرف كيف يتغلب عليه عندما وضع خطة غريبة وعجيبة ..اظن ان انور سلامة الى الان ما فهم فيها حاجة.


} جمهور الهلال اصبح قريب جدا من الهلال.


} بالتالي فان الكأس اصبح اقرب للهلال.


} شبيبة القبائل الفريق الذي بهر الناس بقوته جاء وخسر من مازمبي 1-3.


} الترجي التونسي خرج بنتيجة ممتازة امام الاهلي في القاهرة.


} في كرة القدم ما في كبير.


} اذا اراد الهلال ان يفوز ببطولة الكونفدرالية ..مطلوب منه المزيد من الجهد.


} فريق الفتح الرباطي يبذل مجهودا كبيرا ...وهو لانه لا يلعب باسمه يبقي مرشح بشكل كبير للبطولة.


} مطلوب من الهلال كلما يتقدم خطوة في البطولة ان يضاعف من جهده.


} المرحلة القادمة تحتاج الي المزيد من الجهد اذا كنا نقصد البطولة.


} الغرور ...سوف يعصف بينا بعيدا.


} الغزل الاعلامي فيه الكثير من الخطر.


} لكن نملك لاعبين وجماهير واعية.


} والحمدلله افتكر اننا نمتلك مجلسا راقيا ويعرف كيف يخطط للبطولة وكيف يصنع الاستقرار.


} والاجمل من هذا اننا نملك (ميشو).


} الهلال كان يفقد البطولات بسبب عدم الاستقرار الاداري والفني في الهلال.


} وفروا للهلال الاستقرار تجدوا البطولة.


} اعملوا حسابكم من (الحوافز).


} الكونفدرالية ..ممكن تجيب ليها (حوافز).


} نحن اقرب من أي وقت للبطولة.


} لاعبو الهلال يجب ان يعرفوا ذلك.


} الاصابات والايقافات المهدد الاول للهلال.


} لذلك لا بد من متابعة اصابة هيثم مصطفي في كتفه ..ولابد من مراجعة الحالة الصحية لعلاءالدين يوسف ويوسف محمد.


} المعز محجوب عليه العناية اكثر بنفسه ..لأن اصابة المعز ...تجعل جمعة بين خشبات الهلال ..وهو لا يمتلك الخبرة الكافية.


} لا سيما وان المباريات القادمة ..مباريات تحتاج الي (الخبرة).


} في مرحلة دور الاربعة ...والنهائي اذا تأهل الهلال باذن الله ..مهم ان يحسم الهلال امر التأهل او الكأس في المباراة الاولي التي سوف يلعبها خارج ارضه.


} سوف اردد هذا الكلام كثيرا ...يجب ان يحسم الهلال امر المباريات القادمة خارج ملعبه.


} احسموا جولاتكم الخارجية وانتصروا خارج (المقبرة).


} لا نريد ان نشكل ضغطا علي الجماهير وعلى ملعبنا ..لذا مهم ان ننتصر خارج ام درمان.


} مباريات المقبرة ..عاوزنها للدفن.


} اذا واجه الهلال الفتح الرباطي او الصفقاصي فان مهمتنا الاولي هو الانتصار في المغرب او تونس.


} لولا انتصار الهلال علي الاتحاد الليبي في ليبيا لاصبح موقفنا حرجا للغاية.


} وربما كنا نفقد حتي مبارياتنا التي نلعبها في (المقبرة).


} الفرق الكبيرة اصبحت تحقق البطولة من خلال الانتصار خارج ملعبها.


} الهلال اذا باغت الاندية في ملاعبها سوف يجدها (حملان) وديعة.


} واندية شمال افريقيا تستأسد خارج ملاعبها.


} الصفقاصي حقق بطولة الكونفدرالية على حساب المريخ بعد ان انتصر عليه برباعية في استاده ووسط جمهوره.


} وكذلك فعل مازمبي نفس الشيء عندما تغلب على الهلال في ملعبه بخماسية.


} اذن الانتصار خارج الارض ..هو طريقنا للبطولة.


} اذا اردنا الكأس حققوا الانتصارات خارج ارضكم.


} الحمدلله ان مباريات الهلال الاولي في دور الاربعة والنهائي اذا تأهل الهلال ان شاءالله سوف تكون خارج ملعبه بعد تصدر الهلال لمجموعته.


} يا هيثم ...انتصروا برة.


} انتصروا برة.


} وان شاءالله وباذن الله ..الكأس حقكم.


} هذا الجيل جدير بكأس خارجي.


} الله يبعد العوارض ...والحوافز!!.


} العوارض قادرين عليها ..لأنها في النور ..الكلام (الحوافز) لانها تكون في الظلام.


} خبر عاجل: مباراة الهلال والمريخ في (المقبرة) متين ..عجلوا لينا بيها ..نفسنا فاتحة للضحايا.




عند اللزوم فقط




احتمال


احتمال (الحوافز) الدفعها جمال الوالي لحي العرب ..دفعها عشان يصلحوا بيها ميناء بورتسودان...وناس حي العرب فهموا (الحافز) غلط.


احتمال...الزمن دا ما في حاجة بعيدة.


هسع دا احتمال دا.




الاهداء


لو ارسطو ...حضر مباراة الهلال والاتحاد الاخيرة ...كان خلي (الفلسفة) البعمل فيها دي وبقي (محلل) رياضي.


احسن ليه من النظريات البعمل فيها دي.


محمد




نظرية


انتوا (بشة) دا كان بيلعب في الدوري الايطالي ..قبل الهلال ..الزول دا زي الشفتو قبل كدا في (انتر ميلان).


طبعا انترميلان دي بالروسي يعني (الموردة).


هسع دي نظرية دي.




حوار من طرف واحد


واحد جاء من روسيا بعد عشرين سنة اغتراب ..صاحبو قال ليه : اكتر حاجة عجبتك في روسيا شنو؟.


زولكم القادم من روسيا ..قال ليه اكتر حاجة عجبتني في روسيا (الفضائية السودانية) تصور هناك بتشوف القناة السودانية دي حاجة حلوة خلاص.


زولكم التاني قال ليه : غريبة ..تصور نحن هنا الفضائية السودانية دي شايفنها زي (الكورنر) البحسبو الحكم للمريخ.


ما في ليه أي داعي.




افتراض


ناس المريخ ديل بنتظروا خمس سنوات ..وبقولوا بكري المدينة (ولدنا).


انتظروا ..الخمس سنوات ما كتيرة.


هسع دا افتراض دا.




اقتراح


بقترح ناس المريخ يعملوا ليهم (طابق ثالث) ويكتبوا فيه للصحفيين فقط.


واضح انو ما عندكم حاجة غير الكلام ...عشان كدا اعملوا طابق للاعلام السالب وخلوهم يكتبوا ليكم عنو.


هسع دا اقتراح دا.


سينما..سينما


بكري المدينة لو كان شافو يوسف شاهين قبل ما يرحل كان عمل ليه فيلم اجنبي.


الزول دا بديني احساس انو (الباكات) في البلد دي شغالين بدون (كلّي).




سيدا والغزال..اشياء لا تشتري




الفرق بين الهلال والمريخ اصبح واضحا ..وهو بالتأكيد ليس في النقطتين التي تفصل بين الهلال والمريخ في الدوري الممتاز.


ولا في الـ 18 نقطة التي فصلت بين الهلال والمريخ في احدي بطولات الممتاز.


وليس كذلك في 5 بطولات للممتاز التي حملها هيثم مصطفي على التوالي.


الموضوع اكبر من كدا.


اكبر من الطابق التاني.


واكبر من حكاية رئيس يتنحي.


واكبر من (الحوافز).


عارفين الفرق بين الهلال والمريخ يتمثل في شنو ؟..يتمثل في القيادة الرشيدة للكابتن هيثم مصطفي الذي زرع وسط لاعبي الهلال قيم الهلال ومثله وقادهم بادب الهلال وشموخه.


الان انظروا للروح التي يلعب بها الهلال ..روح تسعد وتفرح ...تشعر ان الهلال اسرة واحدة ..وان المحبة بينهم كبيرة.


أي لاعب يسجل هدف ..تشعر ان الهدف سجله لاعب اخر ..غير الذي سجله ..لان سادومبا عندما يسجل فرحة كاريكا اكبر من فرحة سادومبا والعكس.


عندما يسجل مهند الطاهر تشعر ان الذي سجل الهدف هو هيثم مصطفي.


حتي ديمبا وسادومبا ويوسف محمد لا فرق بينهم وبين خليفة وبويا والنعيم رونالدينو.


فعلا الهلال فيه اشياء لا تشترى بثمن ..كفي ان هيثم مصطفي لعب رغم تحذير الطبيب وكان يشكو من الالم والوجع في كتفه ..مع ذلك كان من نجوم المباراة.


كفي ان مهند الطاهر سمع نبأ رحيل جدته قبل ساعة من المباراة وكان حاضرا بقوة في الشوط الاول رغم الاحزان والاوجاع.


هذا هو الهلال.


مجتمع مثالي ..لم تهزه الصراعات الادارية ..ولم تنل منا الديون ..انه الهلال.


احمدوا الله كثيرا علي هذه النعمة..وحافظوا على هذا الفريق ..لانه لن يتكرر..رغم ايماننا الكامل ان الهلال ثابت ..نوره في الارض ..وضياؤه في السماء.


ما اسعدكم بهذا الفريق.



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
محمد عبد المـاجد . ☢☢ • ناس بتلعب مع (اتحاد) ليبيا..وناس مع (اتحاد) مدنى البرنس والغزال (تضحيات) غير قابلة للتعليق
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
☢☢عـشاق الهلال السـوداني☢☢ :: المندى العام والنقاشات :: منتدى النقاشات-
انتقل الى: